MAJALIWA AMPONGEZA MWAKINYO KWA KUMCHAPA MWINGEREZA

WAZIRI MKUU Kassim Majaliwa amempongeza mwanamasumbwi wa Kitanzania, Hassan Mwakinyo (23) kwa kumchapa bondia Mwingereza, Sam Egginton.

Mwakinyo alimchapa Egginton kwenye raundi ya pili ya pambano lao la masumbwi lililofanyika Jumapili, Septemba 9, 2018, huko Birmingham, Uingereza.

Waziri Mkuu ametoa pongezi hizo leo (Ijumaa, Septemba 14, 2018) wakati akiahirisha mkutano wa 12 wa Bunge, jijini Dodoma. Bunge limeahirishwa hadi Novemba 6, mwaka huu. Amesema bondia huyo amelipa heshima kubwa Taifa kwa kulitangaza kimataifa katika nyanja ya michezo, hivyo amewataka wanamichezo wengine nchini waige mfano wake.

Wakati huo huo, Waziri Mkuu ameipongeza timu ya Taifa ya soka ya wanawake (Kilimanjaro Queens) kwa kutwaa kombe la Afrika Mashariki.

Pia ameipongeza timu ya vijana wenye umri chini ya miaka 17 (Serengeti Boys) kwa kuwa washindi wa tatu kwenye ukanda wa Afrika Mashariki na Kati katika mashindano ya Shirikisho la Mpira wa Miguu Afrika (CAF). “Hongereni sana wanamichezo wetu na endelezeni moyo huo wa kizalendo mliouonesha katika kulitangaza Taifa letu.

Pia Waziri Mkuu amesema mwaka 2019, Tanzania itakuwa mwenyeji wa mashindano ya mpira wa miguu kwa vijana chini ya umri wa miaka 17 (AFCON-U17) yanayoandaliwa na Shirikisho la Mpira wa Miguu Afrika.

Amesema hiyo ni fursa nyingine ya kipekee ya kuitangaza nchi katika nyanja za kimataifa, hivyo Serikali kwa kushirikiana na wadau mbalimbali inaendelea na maandalizi, ambayo yatahusisha ukarabati wa viwanja vitakavyotumika katika mashindano hayo.

-ends-